قصائد في الملحون

قصيدة المالحة

من نظم: محمد المدغري
*********
دسيني تحت لخلال**بين ذروعك لملاح
اللبة والدواح**ونهيدات كالتفاحة
خفت يشوفوني عيونك**يهلكوني يا المالحة
——-
ألايم سلم روح سالم**عقلك يرتاح
وانا عقلي ما راح**هايم ما صايب راحة
نشكي وخيول لغرام**مكرودة عل المكابحة
علفة في علفة مرادفة**كل مسا وصباح
نزلوا عنف فالمراح**بهدير خيول صفاحة
نحكي بحر وفراتنو**موج على قلبي كافحة
عطيت دمامي ولا بغى**يرفق بالنُّوَّاح
وفزعني بالدواح**والرامي والحياحة
الزناجل ومقايس الذهب**والنجلات الجارحة
وعيون شطابة مغنجة**بنشاشب ورماح
مطحونة من للماح**هندة قطرة جراحة
ماكيف سيوف النجال**عل العشاقة جايحة
والقلب المجروح**من سيوف الوجنة برّاح
سيف عنترة فكفاح**بوسيفين الذباحة
دسيني أيا أم النواجل**سيفانك ذابحة
**************
آه على من شرب**ليعة الهجرا من لوضاح
بين دواوح ودواح**ولهيفات الدواحة
داحوا يا وعدي ودوحوا**بالعطفين الذابحة
آه على من كيتو قديمة**من غير مزاح
بين جوايح وجياح**جايح ما صايب راحة
جحاجح لغرام بين كبدو**وضلوعو طافحة
عذروني في الحب**ما قدرت نغطي ما باح
بان الدمع الكفاح**والكيات اللفاحة
كيف نكتم الحب**والصفورة عن خدي لايحة
الحب طغى دارني مراغة**بخيول أصاح
طلق عجاج فالمواح**بالسربات الجحجاحة
عقلي تاه معاه**والسوالف مطلوقة سارحة
مخالب الهوى موجدة**بالعشق الفضاح
بين الخد الوضاح**والنجلات الوضاحة
قوم لاَّ عرفوا**فعالها تحت اللحدة رايحة
*****************
ارباب التيهان والهوى**ما رفدوا من طاح
لو يبقى فالصحصاح**بين بطايح ضحضاحة
سفونو بين الرياح**تقلَّب دون مراوحة
من يَرحم يُرحم يا هلال**شرق لي لتواح
أهل الفلج ولاح**جودي جودي بسماحة
من يَسمح يُسح له**كوني يا ولفي سامحة
من تهرب منو هرب ليه**تريع وترتاح
قالوا ناس الرجاح**هلّْ لعقول الرجاحة
واللي تكبر به رافقو**بمودة ومسامحة
أنا هارب ليك والدوا**فعصير من جباح
بين شفايف وراح**ورحيق وريق وراحة
ولاَّ عضة فالشفيفة**تمسى روحي رايحة
ولاَّ تمريغة على الرخام**الساطع فنباح
غاية كنزي ورباح**زهوي وسرور وراحة
ولا تكميشة فشي لويمات**لبيقة ناصحة
****************
واللي لسعوه لشفار**وسقاه العشق ارتاح
هايم واهي لحاح**ليس بحالو لحاحة
بين ابواب الزين**كينوح ودموعو سايحة
هذا وعد كبير سول**عليه سنون رماح
ماذا زلغوا بارواح**بالشفرين الذباحة
من مات من عيون ساحرة**غير قرا لو فاتحة
يا خد البَاغة طنينجة**والورد الفياح
حلي لي بالمفتاح**ديك العرصة الفياحة
ننظر شي رمان والتفافح**ورنيجة ناصحة
والعطشان يكب ويروى**يرشف من لمواح
بين خواتم وراح**باحت صخرة بوَّاحة
سقيه وسقسيه**قالت اهل الكيسان البايحة
لله الحد أيا أم النواجل**طلقي لسراح
أرمقات الصياح**خلف جلالب صياحة
نعمي ليَ بالرضا**نفوزوا بسويعة صالحة
**************
الليل يغطي هبالنا**بنزايه وفراح
بين دهاة الفصاح**والغزلان المرتاحة
بين جلايبها تروج**مقايسها مداوحة
اللي نهوى قدها**تتمايح بين دواح
بين شجار ومياح**والقطبان المياحة
ترقص من تحت لطيار**وخمايلها مداوحة
والشعر المسروح**من كتافو لعطر فياح
ولد نعامة فجناح**فدفد ورغا وتماحى
والسالف ثعبان عضني**عضة ما هي مازحة
الغرة وجبين نورهم**شرق وقت الصباح
والخدين فتوضاح**فاللون ثقال وضاحة
نحكيها وردة عروس**صبحت في عرصة فاتحة
الحجبين مع النجال**طعنوا قلبي بسلاح
يرميوا على الفلاح**من صدفو دون مزاحة
لا تحساب العين**والحواجب طعنة مازحة
*****************
الشامة والخال فوق**ورد الخد الفياح
من شوف عيون طماح**ونشاشبها جراحة
والأنف بريني يعس**في ذيك العرصة الفايحة
الفم فريقو كويس**التذهيب آمن راح
والثغر جوهر نصاح**فيه نسايم فياحة
مرشفها فيه لعجوب**وعجوب الطيبة فايحة
والرقبة عراض فالفيافي**يرعى فبطاح
يتهدى في تصياح**خلف جلايل سياحة
وإلى تاه الزين**لاه ما تبقى دمعي سايحة
والذرعين مخاد**والكفوف موبر فجباح
وحناني في توشاح**وصباع قلوم وضاحة
بالجور يكتبوا حكام**لرباب الهجرة الناصحة
الصدر المرمر عل الرضا**ونهودو تفاح
من تحت قميصو فاح**والطيات الفصاحة
ما قبلو لفدا ولا **يقبلوا فالروح مسامحة
*******************
والسرة بلار كاسها**سطعت فيه مواح
لو شعلت في تلحاح**نار القلب اللحلاحة
الخصر نحولو على نحولي**يشكي بمقاشحة
الردف ألطيف ردف الجراح**يثقل لجراح
عمر لقميص ولاح**تحت المحزم يداحا
بملوه تعدى على الخصر**فين يبان مقاشحة
فخاذ عسارة تقلبوا**عل الوطا وصياح
حس رديفو مياح**نارو جمرة لفاحة
نار الساق ونارهم**هلكوني دون مراوحة
الساق سقاني وساقني**فسواق التجياح
خلاخل في تصياح**كرن وسربة حياحة
شو الخال يخلي كثر**من خايف المناطحة
لقدام رنيجات دوحوا**في قلبي تدواح
درجة دامي صداح**في عرصة كيتماحى
عسى يعطف لي بصورتو**تبرا الروح الكالحة
هاك أراوي ما تقول**رحم الله الفلاح
وسلامي لأهل للواح**ناس العلم الشراحة
والجاحد خليه في غفلتو**من نومو ما صحا

قصيدة دمليج زهيرو

دمليج زهيرو صابغ الشفر كان فجيبي يا أهل الهوى ومشا ليا
باش نجاوب إلى تسال عنو تاج الغزلان

غاب زمان الهجرا وتاك بدري وهنا قلبي وراح من كل بليا
مهما زارت رسمي هلال عيدي راحت البدان
بتنا فحديث الحب والهوى وغزالي تهدي مدام كاس الحميا
واحنا فبساط رفيع ليس دركو عاشق فزمان
حتى راح الديجور والصباح تجلى ورمات فالشروق الذهبيا
وطيار الروض عالاغصان تنشد طبع صبيهان
قالت مصباح الزين يا العاشق هذا وقت الرواح من غير خفيا
ودعتك فحفظ الكريم من لا تراه عيان
نطقت وقلت لبودلال خفت يطول الميعاد يالعذرا البهيا
ولا تسناني يا الريم وتخليني هيمان
جبدت ولفي دمليج من ايديها زين الشفرين روح ذاتي مدميا
قالت ليا يا عاشق البها لا تبقى حيران
هاك الدمليج أعاشق المحاسن صونو وحضيه فالحجوب السريا
حتى نهدف ونزور مرسمك نصيبو محصان
ودعت هلال الزين تاج البها ورجعت من الفراق روحي مدهيا
وعملت فجيبي بالاشواق دمليج ضيا العيان
تم الدمليج مشى وطاح لي وبقا عقلي كيروج صبحان وعشيا
وانا لا حالة كيف حالتي في الضي و ديجان

*****
دمليج زهيرو غاب مبان وبقيت من فراقو مهموم حزين
ما تشاف مثيلو فيد سلطان عند العرب ولا فالهند وصين
دمليج لا يوجد فمكان فالروسيا ولا فخزين ستالين
دمليج الموضة يا فهيم من ذهب الصين وجا لتاج البنات هديا
صنعوا ماهر ذوقي لبيب وحكيم من اليونان
دمليج مرصع بالادرار من شغل الأناضول فيه حجرة تركيا
دارت بحجار الفوندو لا يدرك بثمن
دمليج لا مثلو وجاد عند الملوك الحاضرين في وطون أسيا
ولا في كندا ولا في أرض غموق السودان
دمليج ما وجد مثله في أرض الشام دون ريب وسوريا
ولا في القاهرة الصايلة ولا في عمان
دمليج الموضة ما وجد مثله عند اللي حايزين همة ومزيا
ولا دركوه اهل الاموال في الفرس وخرسان
دمليج الموضة ما يخلصو مال الأمريك والمدن الشرقيا
وكذ لك مال اسبانيا وغرناطة واشبيليان
مدت لي تاج الاريام هاذ الدمليج ولا عرفت كيف جرى ليا
وعملتو في جيبي وطاح لي ومشا يا الاخوان

طاح الدمليج وحار أمري وبقيت كنخمم ضي و ديجور
يعذر حالي من كان عذري ولا من بحالي جرحو معكور
سرت نفتش ونزاح صبري وانا كليح هايم والدمع يفور
درت في باب الخوخة مع الكنيف وحوز الكدان ما عطف قلب عليا
ورجعت على الصفاح كنسول دمعي هثان
ودخلت مع الاقواس والجزيرة حتى العدوة مع حواز المخفيا
بوعجارة درتو على النهاية واكد عجلان
قطعت الواد وسرت للصفيفح وانا حالي كظيم ما صبت حميا
وطلعت علىراس الجنان سولت اهل الغيوان
فتشت على الدمليج يالفاهم في الدوح ولا جبرت من يصغى ليا
ودخلت على صلاج كنفتش وانا ولهان
ما صبت من اعطاني خبار ولا من شافو يا رجيح فأحضان صبيا
وبقيت على الدمليج كنسول سرو يعلان

***********
سولت على الدمليج الاريام وانا فغير حال وقلبي مسقوم
درت فدرب السراج بقوام والطالعة صغيرة فضي و ديموم
سولت بعرفي ناس الغرام وجميع من صبية فبنات اليوم
درت فدرب الحرة مع السياج على دمليجي سألت ولفي ثريا
قالت لي ما شفتو ولا سمعت خبارو فمكان
سول فالقطانين راك تجبر تما جمع الاريام عند العشويا
ومشيت وسلت اهل الغيوان وليس خبرني إنسان
قالولي سول يا عشيق في حومة البليدة إيلا جبرتي ماريا
لعل تعطيك الخبار بالدمليج المصان
ومشيت للبليدة ودرت درب الميتر وسألت كل من هي ذوقيا
سولت ناس الحب والذي شاقو فالهجران
ومشيت ودرت فالزجزفور وانا واله وحدي ودمع العيان سخيا
والحفارين جميع درتها و زقاق الرمان


طال شقايا وهجرت المنام وانا كظيم هايم والعقل فليج
من حر الصد فقدت المرام بين الضلوع جمري موقود سريج
و فنا جسمي يا صاح وسقام لا حال حالتي بفراق الدمليج
فتشت فبوعقدة على النهاية وزقاق الما مشيتلو في صبحيا
ما صبت من عطاني خبار من كهول وشبان
وطلعتعلى المنية سريع وراحت الشمس الاولى وديك الفوقيا
ولدرب بن عزاهم سرت كالح قلبي لهفان
ومشيت معزم يا فهيم فتشت احواز الطالعة وناري مكديا
فطريق السنيما لقاوني زوج بنات كران
شافوني ناس الحب كنسول قالو مالك روح ذاتك مهديا
قلت مشا لي دمليج من فراقو عقلي هيمان
قالت وحدا يا عاشق البها دمليجك موجود عند هيفا بركيا
قالت لي صابتو نهار كان يزور السلطان
طحت وبست الأرض قلت ليها لاقيني بيه يا الريم العذريا
قالت دابا ياتيك بالوفا وهنا واطمئنان
قلت لها يا تاج البدور وين يكون الميعاد بينا دون خفيا
قالت يوم الجمعة الجاية تلقانا وكدان
أجينا لجنان السبيل قدام الصهريج الجديد وقت الذهبيا
تم رجانا ولاّ تصيبنا نرجاوك يعلان

************

راق الخاطر ونسيت الكدور ونكيت يا الفاهم جمع الحساد
وفرح قلبي ومشيت مبشور بقيت كنراجي شاخص التماد
في يوم الجمعة قمت مسرور مشيت بالاشواق في وقت الميعاد
صبت بنات الغيوان كتراجيني في الموعد بجلالب فضيا
وشرابل من ذهب الشريق والتلثيمة حسن
قالو سهلا وميات مرحبا بالعاشق الغريم ليك بشرة وهنيا
بايعت وقلت على وصولكوم تتفاجا الاحزان
قامو ومشاو بزوج باللطافة جابو وحدا ثالثا كن ثريا
قالو هذ العشيق صاحب الدمليج الفتان
قالت لي يا سود النجال دمليجك عندي دون ريب ولا شكيا
لكن لا تمشي لعندنا تصطاب الكيسان
قلت لها يا اعز البنات مالي قدرة حتى نخون بعد الولفيا
راقب فيا وجه الكريم نعم الحي المنان
مدت لي دمليجي وقلت ليها يجزيك بكل خير خالق البريا
قالت فالحين بلا جميل حشى مثلك يهان
ثم ودعت الباهيات وفرح قلبي ونسيت كل ما فات عليا
ولقاني بالدمليج رب الورى خالق الاكوان

************

دمليج الموضة جا ليدي واظفرت بيه وتفاجا كل غيار
وافرح قلبي ونسيت نكدي ورسلت للوجيبة صابغ الاشفار
راحت القلوب هلال عيدي سلطانة الغوالي حرة لبكار
وصلت رسمي تاج البدور زينة الآسم مكمولة البها الهواويا
صابت قلبي مسرور بالوصول وناشط فرحان
وانا محتال على وصولها من شوقي وجدت كل ما يزهى ليا
المقاعد والشليات جبتهم من الهندوسان
مهما جلست تاج الاريام ، نزلت انواع الطبخ والتفاكه وقتيا
كوكا كولا خلف الطعام شلّى نحكي بلسان
قالت مصباح الزين يا العاشق وين الدمليج قلت لضيا عنيا
دمليجك ودرتو وغاب عنّي ومشا ما بان
واحكيت لها يا صاح ما جرى لي وهلال الزين بارزة تصغى ليا
وانا قلبي مجروح فوق خدي دمعي هثان
قالت فالحين زها وريع، واعرف دمليجي يا عشيق ما يبقى فيا
قرب وانسى على وصولي ساير لمحان

دمليج زهيرو صابغ الشفر كان فجيبي يا أهل الهوى ومشا ليا
باش نجاوب إيلا تسال عنو تاج الغزلان





قصيدة غـويـثــة


اللايم سلطان الحب ساكن في ذاتي بجيوش رايد مراتي
اللايم ما نقوا له تقول شي ليث
اللايم بحر الغيوان عامر و عاتي له قراصن تاتي
اللايم و رياحه كتزيد تشتيت
اللايم لو ذقت من عداب هجراتي تعدرني في غصاتي
اللايم و سبابي في الغرام بوتيت
اللايم من يوم انظرتها بنجلاتي بين الريام مولاتي
قلت ليها يا قوت الروح غثني غيث

أ غويثة خاف من الله عالجي داتي آتي لمرسمي آتي
بك يكمل فرحي يا لالة ام الغيث

يزهر بك المكان يا تاج الغزلان بين دواح الاغصان باغي تسقيني
يحلى بك الدنان و الحاسد نكدان ضي و ديجان و الصغر مواتيني
و النظرة في بهاك هي تكفيني

أ غويثة زهيني يا نزايه اوقاتي روحي نهيب و تقاتي
أ غويثة لجمالك يا شمعة البيت
أ غويثة و يبات الشمع في الحسك راتي و على الدموع ماراتي
أ غويثة وحنا متلايمين في حديث
أ غويثة و منشد في شعار مياتي قاري و حافظ بياتي
أ غويثة يسبي العقول كيف نسبيت
أ غويثة يا مولاتي كويسي هاتي نسطاب طيب نشواتي
أ غويثة راح براحة اليوم جيت

أ غويثة خاف من الله عالجي داتي آتي لمرسمي آتي
بك يكمل فرحي يا لالة ام الغيث

نغنم ساعة معك لكن من رضاك بالي يرضاك يا اللي قلبي كيبغيك
زينك ما يندراك في عراب و الاتراك يا راية في العراك قدام الملك
يا تاج الباهيات اسم الله عليك

أ غزالي قدك مقدود صايل مواتي يميس بين دحاتي
أ غزالي و تيوتك كان تعابن حكيت
أ غزالي و جبينك كهلال في نعاتي غرة شموس مقلاتي
أ غزالي و الحاجب تركني في تمريت
أ غزالي شفت عيونك هالكة داتي هما سباب طعناتي
أ غزالي من سحر سحورها تأديت
أ غزالي عجب العجاب على الوجناتي وردات من الجناتي
أ غزالي الا قبلتهم نعيط بريت
أ غويثة خاف من الله عالجي داتي آتي لمرسمي آتي
بك يكمل فرحي يا لالة ام الغيث

خدك يا بودلال وردة فيها خال و المعطس في كدال حارس ورد خجيل
ريقك صافي زلال و احلى من المصال يشفي علال و ثغر كبدر اسقيل
و الفم كويس للشتية و التقبيل

و الغبيبة تسحر الاذهان جميع سداتي و الجيد جيد حرجاتي
تقول جيد الربراب اللي ربى في تخنيت
و البروق الا شاروا كبروق رعداتي زندوا ازنود كياتي
و نمول خواتمها باهية في تنبيت
الصدر تفاحه مالوا على ملاقاتي باروا معاه حيلاتي
ما وصلته ما قلت اليوم ليمك جنيت
و الارفاغ اشوابل نحكي في يم لجاتي امتى على فرشاتي
تشوفها تتمايح و نال ما تمنيت

أ غويثة خاف من الله عالجي داتي آتي لمرسمي آتي
بك يكمل فرحي يا لالة ام الغيث

يكمل طيب الافراح بالسر الوضاح و الردف أ صاح ترك ديواني مجيوح
مجروح بلا جراح من شوفة الالماح شفت الدواح داح و الخدين تلوح
عينك ا بودلال تبعوني في الروح
ما ينتهى توصافك يا اللي في مياتي في اللي مضى و ما ياتي
و لا نويت انخصه مزلوق او تبييت
الا خطيت او وتيت معك رب الاشياتي يمحي جميع سياتي
و لا يواخدني مولاي في شاين خطيت
خود يا راوي حلة صايلة بمعناتي ما فيها شطر واتي
من فضل مولانا و اسيادنا اهل البيت
للجحود تسنح بمهارزي و كراتي بارود هاك غياتي
كل داعي في قتيله لا تدير تلفيت
من طغى يا ويحه بفنى بسم مولاتي و نشاشبي و نفضاتي
انعايره و نوصف اقل الرذال المقيت
ما درك سطوة بين الناس كيف سطواتي عندي عليه حجاتي
شحال هايتوا و بعدها ابقاوا في خزيت
و السلام نهيبه ما فاح طيب زهراتي على الاشياخ دهاتي
و اسمي عبد الهادي في تمام الحديث
يا المولى تغفر ذنبي في يوم مماتي تجعل به فرحاتي
من اللظى يعتقني نعم الغني المغيت

أ غويثة خاف من الله عالجي داتي آتي لمرسمي آتي
بك يكمل فرحي يا لالة ام الغيث








قصيدة محبوب القلب

الحربة

محبوب القلب زارني يامس ياعشراني وصلني لرصام ونكا جميع الرقبان
صايل مابين قرانو سيدي بو وجنة منكطا

القسم الأول

هدي مد شحال ونا بالهجر فاني حتى ولا بصدود لوني مثل اليرقان
والطرف اجفاه وسانوا ورقتي بالحب ساقطا
نتفكر كل يوم بدري وبهاه الساني ونبات بوحشو هميم نرتي مثل الورسان
والقلب قوى تمحانو وخلاكي بالشوق لهطا
مايعذرني فحالتي ونواي وغيواني غير لي ملسوع بالغرام أو هوى الحسن
الله يحسن اعوانو قاصو سهم البين ماخطا
لازلت املازم الصبر وخفيتو فكناني حتى جاد الدهر بالزهو وكمال السلوان
ورحالي الوقت عنانو ويامي ولات ناشطا
بوجود لي هويت يوم وصلني لمكاني من غير نويا فالجفا قصر والتيهان
جاد عليا بحسانو ونعم لي من بعد مابطا

القسم الثاني

البارح زارني حبيبي وحيا رصمي مع قليبي فرصه فالحاسد الرقيب
طيبو يحي شداه طيبي ما مثلو فلورا حبيبي شملالي قامت الرطيب
ونفا بزيارتو نحيبي ورجع بعد الجفا قريبي وظفرت بغاية النصيب
يامسعد يوم جا الباب وناداني مهما انقر الباب قمت من غير عقل عجلان
كني طير بجناحو وافتحت النقشا الكطا
نوجد ولفي علاج ذاتي واقف يرعاني رافل فثياب لحرير مختلفا على لوان
يتبختر في روانو ورضات حرير مشرطا
بايعت وقلت له يامصباح اعياني بيك أهلن وميات مرحبا يادابل لعيان
حبك راني فشجانو ورياحو عني مسلطا
زاد لبساط من هويتو وكداك بغاني وجلس قدامي وهضر نكابو غض البان
بدر سطع بين مزانو وخلاكو ماهي مفرطا
حضرت أوان الزهو وسقيتو وسقاني وغنمنا ليلة الا دركها عاشق فزمان
بوجود قدام خدانو روحي فجمالو مربطا


القسم الثالث

مزين الزين حين يعطف والسعد معاه حين يوقف بديك البغيا علي لوفا
لكن ورد الخدود نقطف لين سود النجال يعرف عشقي فبهاه بالصفا
لازلت ولا نزول نوصف حسنو وعللوصال ننصف يستاهل شارد العفا
حتى واحد فالبدور من غير مايهواني لينو دوقي فلاسفي وظريف وحسن
محلا عني تيهانو يضوي رصمي إلا وطا
عوض هيهات ماخطر فالغرب الجواني ولا فالبهجا الصايلا ولا فاليمن
والشام وحواز اركانو ولا فديرا ومالطا
قد نحكيه فلمثل كا بند العثماني أولا رايا مشهر مابين الشجعان
سلبو عقلي حجبانو وعيون صرادا معربطا
وخدو الورد كيفتنو بالون القاني فاقو جلنار والشكرنط وبلعمان
والغنجور فتبيانو كبرني حوم على لكطا
والمبسم خاتم الذهب والعتنون سباني من تحت الغبة الجيد فايق جيد الوسنان
راتع فحراج وطانو غاجي بين الجبال ولوطا

القسم الرابع

ينفر سود النجال مني ولاباغي يروف عني ولفي سلطان كل زين
حبو يالايمي سكني بشفار انواجلو طعني ضي الغرا مع الجبين
ونا بمحبتو معني لكني خاب في ظني لو صبت نراه كل حين
من بعد كان لي موالف ولعاهد عطاني عاهد وثيق لاينصرف عمرو يالخوان
وحلف ولفي بيمانو من رصمي هيهات لاخطا
وفرح قلبي كثير وركبت على شيهاني شيهان لانرت عوض مثيلو للآن
وحليبو بين اسنانو باقي بلوبرا مزركطا
والسرج عليه د الموبر باهي يرضاني وركابو من خالص الذهب ولجام جمان
زان الجوهر عقيانو والديل وشهرا معلطا
متقلد بصوارم الوغا لواحد يلقاني من لامت لحسود ولعدا فنهار أميدان
والي اظهرو شجعانو من ضربي تبقا مسهطا
نشبه فالحب قيس وبنو سهل وبن هاني ونودي بشجاعتي على الظاهر والغصبان
وقتي نداه ازمانو مزين الواري إلى عطا

القسم الخامس

ختصرت فوصاف الزين ولفي ماينتهى في بهاه وصفي محبوبي باهي الحروف
حسنو شلا نطيق نخفي لكن بولاعتي وعرفي جبت معانيه بالحـــــروف
ونتمتع فبهاه طرفي ترى عنو نعود منفـــــي مزين سوايع العطـــوف
كيعرفني غلام طيعلو طول زماني واغدر فيا كامل البها وانكر لي الحسان
شفا فيا عديانو واكواني كية ملفطا
واصبرت على اجفاه واطلبت الله الغني يجمع شملي بالحبيب روح داتو الكيان
يقبل شعري ولحانوتتفجا ايامي القانطا
أحافظ مايتي تهلا فرموز وزاني وتأدب لدراغم الغا شياب وشبان
أهل القول ومزانو ناس ألا يرضاو فالطا
وسلام الله عنهم بقلبي ولساني مفاح الورد العبيق والنسري والسوسان
والزهر فدوح اغصانو ونعايم ربي الباسطا
والداعي مايلو مزيا ديما مدياني إلى يخرج للمشاليا نسقيه القطران
لاني زنجار اعيانو يعرفني فمرايمي اسطا
وذكر اسمي الحاج فضول حبر المعاني ارجاي فملا ينام يختم لي بالإيمان
ويغمدني فحسانو يمحي عني ساير الخطا





قصيدة - عاشق ومعشوق

(لمحمد العلمي)

عــذروني فــالحب و الهــوى يــا عــشاق الــزيـن ولـبها وجـدولي لعــذار
لاش تـلـومـونـي فــما جــرا وتــزيــدوبـلـملام هــولي وكـــداري

القسم الاول

آه عــليــا ضــاق خــاطــري من حـرالهجــرة القـاتــلة و الهــاجـــــرني جار
لـيس عــرف ســري ولا درا
و شعـل لـيا جـفاه نــارو فصيــاري
آه عــليــا آه بالاشــواق رمــيت سفــونــي ومركــبي فــالــبحـر الــزخـــار
و مواجــو يا صــاح قــاهــرة
فلجــوجــو تايـهة وما ليهـا صاري

اه عــليـا اه لــيعــتي فـــــــدواخــــل لمهــاج قــارة والــهــاجــر جــبـــــار
مـا هــــزو حــالــــي ولا درى
مــفــتون بحالــتــو وما جاب خباري
مـغــرور ولــغــرور عـادتــو والــزيــن المغــرور صيفـتويا ناسي مسرار
وســرارو فـبـهـــاه ظـاهـــــرة
و تــمادى فــالغرور يفهم ويداري

القسم الثاني

ما هــمك حــالي ولا شفــاك غـياري وانـت فــحالــتي تــتـركـني محـتـــار
فـعـمـاقــي نـــيـران حـــارة
من حـر الـتيـه زاد هـولي وغــياري

أش نـهــو غــرك زاد تـــيهــك جعــــلــك قــاســـية ماتــنعــــم بــــمـــــزار
وخــبــرني لله مــا جـــرا
فـسـواق محبـتــك نبخــس ديــنـاري
أيــلا بجمــالــك كــاتــيه شفــت الـزيـن فكــل جـيــه شلا شافــت لــبصــار
من قــدود ونجــلات ساحرة
رفعـــت قـدري وراقــهـا ســوم عــياري
وايـــلا بخلاقــك كاتــصول صالت اهــل لخلاق بالرضى والعــز وتحــبار
واخــلاق اهـل العــشــق ظاهــرة
وانــا بـودادهــوم رتــفـع مــقداري


القسم الثالث

معـشـر نـاس الــجــاه بــيه حــقـا فــازوا بـالحـلم والصفا والزهد ولسرار
خـلــدوا بــالســيرة الـعــاطـــرة
نـــالــوا فحـياتــهـم كامـل لوقـاري

فـــزتـي يـا لغــزا ل بــالاخـلاق العــليا والــجاه والجمــال وعــلو المقــدار
و عـطــاك الــمولى كــما تــــــرا
اشكر معــطاه نعـم الجـلــيل الـباري
وسجــين غــرامـك جـود لــو ونعـم لــو بالـوصـل والرضى يتـفاجى لغيار
ممــلــوك لسيــدي بلا شــرا
عـطف بـرضـاك جــود لي يا خـنـاري
سعـيـت دمـامــك دون شــك حمــلت حـــمــول لـبعــاد لايــني صــبـــــار
و عــرفــت مهــاجــك نــايــرة
مشحونة بلحسان والطيب الساري

القسم الرابع

للمرأة أدوار خـالـدة صالــت بهـــا دون ريــب شــلا تــروي لــخــبــار
كـــل عـــظيــم وراه حـــاضرة
بنكران الذات كذلك العطف الواري

فــيها نعــم الام كــذلك الأخــت ولحـبـيـبة عــمــارة الـبــيت مـولات الــدار
عــماد الأسـرة الــــزاهــــرة
مـنبـع لـفـراح لامتي واستـقـراري
جـيـت لحــرمــك بغــيت غـايــتي نظـفـر بالمقصـود والرضا ونسعد بمزار
ونـــزور الأســرة الــطـاهــرة
و تــكون ولـيفـتي و مودع اسراري
والشــمـل نجمعــوه بالــمـودة والحـب مع الاحــسان والـعـــزم واصــرار
فـحـيـاة سعــيـدة مـنــورة
تــزيــان معــاك الحـياة يـا نــور بصــاري
فـخـتــام الحــلــة الـرايــقـة عـاشــق و معــشـوق اسمي لـلوالــع يـدكــار
محـمد مـن آل مـن ســـرى
عـلمــي فـالاشــراف من فـظــل الـــباري






قصيدة أسماء الله الحسنى

للشاعر احمد سهوم
بالله باشْيَبْداوْا جْميعْ الْعارْفينْ
وَاللّهْ فَتْحْ فَالْبَسْمَلة
وَاللّهْ عَوْنْ فَالْحَوْقَلة
وَاللّهْ غَايْتْ الْحَمْدَلة
وَالْبَدْءْ او لْكْمالة بَالْجَلالة فْكُلْ حالة
وَالْلأسْمْ الدَّالْ عَنْ الداتْ الإلهية بْديتْ بيهْ نْعَدَّدْ فَ وْزاني
الأسماء الحسني
رَحْمانْ رَبْ رَحيمْ أمَنْهوما يائْسينْ
لاخَلْقْ حارْمه مَنْ رَحْمة
في اَرْضْ كانْ وَلاّ فَسْما
وَلاّ فَغْوامَقْ تْخومْ الْما
مَتْقَسْمة الرّحْمة قَسْمَة قَسْمة اوْكُلْ قَسْمة
تبلغ الْحَيْ وَالْمِيَّتْْ بَحْكَمْتْ الله رَبْ رَحْمانْ فْضَلْ تَبْياني
الأسماء الحسنى
مَليكْ ما حْتاجْ الْسَنْدة ة وَلاعْوينْ
وَلايْليهْ اشْريكْ فْمَلْكه
وَجْميعْ ما فْ: مَلْكه مَلْكه
هُوَ للّي نْشاهْ اُوسَبْكه
وهلْ الاحوال شكوا مللي دركوا وْحين سَلْكوا
ضابوا لامُلْْكْ غيرْ مُلْكه اوْ سرْ الْمُلْكْ فَالْمْلاكة يامنْ يصْغالي
الأسماء الحسنى
قُدوسْ عَنِْ وْصافْ الْوَصّافا كامْلينْ
قدوسْ مايْبَلْغه لَعْقَلْ
وَ لا تْخايْله مَتْخَيّلْ
وَ لايْليهْ فْ لَشْكالْ اشْكَلْ
قدوس ماتْمَتّلْ عَزّة وَ جَلْ خيرْ و َ فْضَلْ
الأسماء الحسنى
سَلامْ لَلْكْوانْ وَالْعْوالَمْ كُلْ حينْ
الشَّمْسْ لوقْرابَتْ شَعْرة
تَحْرَقْ يابْسَة وَالْخَضْرة
ويلاَ ابْعادَتْ اَمَا يَجْرى
الْما فْكُلْ مَجْرة يَجْمَدْ حَجْرة اُو مَنْ اتْحَدّى
يَلْقَى رَبْ الْاكْوانْ سَلامْ لْكًلْ مَّا نْشاهْ فيهَا يجعل تحضاني
الأسماء الحسنى
وَمْنَ الْأسْما يا مَنْ يَصْغى لي مُؤْمِنْ
الْخَلْقْ في حْماهْ تْأَمّنْ
هُوَ اعْطاهْ باشْ تْـأَمّنْ
وَعْلى دْعا الْعَبْدْ يْـأَمّـنْ
كيفْ يَخْشى وْ مَنْ مَنْ في أنْسْ اُجَنّْ عَبْدْ مومَنْ
وَ الْمومَنْ لاَغْنى مْآمَنْ با يَنُّه في حْمى المومِنْ اِيجَعْلْ آماني
الأسماء الحسنى


رَبّْ الْعْبادْ مُهَيْمنْ آمَنْ هايْمينْ
مُهَيْمِنْ رَبّْ انْشانا
وَانْشا اللّي يْليقْ مْعانا
وَعْنا بْكُلّْ ما يَعْنانا
قْواتْنا وْمانا غيرْ حْدانا انْشا هْوانا
هَيْمَنْ مُولْ الْاكْوانْ سيدي عَنْ كُلّْ دْقايَقْ الدّْقايَقْ تَحْقيقْ مْعاني
الأسماءالحسنى
عَزيزْ كيفْ حَتّى وَصْلوهْ الْواصْلينْ
عَزيزْ لاَ اللّي يوصَلْ لُه
وَلاَمَنْ اِيقْدَرْ يَبْلَغْ لُه
وَللّي تْقَرّْبوا مَنْ فَضْله
وَالْكُلّْ اِيحْتَجْ له وَعْلوهْ عْله وْلاَ مْثَل لُه
سَطْعْ الْوَهَجْ مَنْ يْشارَاتْ النّورْ اللّي فْكُلْ صيفاتْ اللهْ الْغاني
الأسماء الحسنى
جَبّارْ حينْ يَجْبَرْ عَنْ فَعْلْ الْفاعْلينْ
عَنْ كُلّْ ما يْريدْ جْبَرْهُمْ
وَالْكُلّْ ما قْضى يَسََّرْهُمْ
وْلْما مْقَدّْره سَيَّرْهُمْ
جَبَّارْ مَنْ جْعَلْهُمْ دونْ غْرَدْْهُمْ مَنْ نْفَعْهُمْ
طَوْعْ لْلأَمْره اِلى بْأَمَرْ لَنّه جَبّارْ جَلْ شانُه شَرْقَتْ فَ كْناني
الأسماء الحسنى
وَمْنَ الأسْماالْمُتَكَبِّرْ آسامْعينْ
صيفة مْنينْ شَرْقَتْ فيَّ
وَجْلاتْ كُلّْ غَبْشْ عْلِيَّ
ظَهْراتْ لي الْكَبْرانِية
وَللّي عْلا عْلِيّا وَالْطَفْ بِيّا وْحَنْ فْيّا
يَتْكَبَّرْ في عْماقْ قَلْبي عَسّاكْ اللَّهْ مَن ابْدَعْ تَكْويني وَنْشاني
وَجْعَلْ لّي مَعْنى
خالِقْ اُبارئْ الْخْلاقْ مُصَوِّرْ الَّلكْوانْ
وما فَ الْكَوْنْ مْنَ الاْكْوانْ مَنْ ما يَدْهَلْ الادْهاني
شَلاَّ شاهَدْنا
خَالَقْ لَخْلاَيَقْ كُلْها بْتَقْديرُه يالَخْوانْ
بَارئْ بْدَعْها كيفْ رادْها فَ التَّقْديرْ الــــــــسّاني
يامَنْ يَتْمَعْنى
خالِقْ اُو بارِئْ آهْلي وْمُطَوِّرْ اُو في آنْ
ما شَغْلوشي عَنْ شي فْ مابْدَعْ لَجْليلْ الْوَحْداني
مَنْ كَايَرْحَمْنا
خالَقْني فَ التَّقْديرْ هاكْدا كيفْ أنا إنْسانْ
بارأْني ليهْ الْحَمْدْ وَالشّْكُرْ مولايا وَنْـــــــشاني
في صورة حَسْنة
وَالْيَبْداعْ اَوْ الْخَلْقْ ماحْتاجوا ايْـنَ وْلاَأَنْ
وَفْكونْ او فَيَكونْ تايْهينْ عْقولْ الْــــــــــفَطّانْي
فَ: شْحالْ منْ سَنة
مَنْ يَبْداعاتْ الله كُلّْ مانَظْراته لَعْيَـــانْ
وَما لاراتْ عْيانْ فايقْ اللّي شافَتْ الاَعْيانــــي
غيرْ فْ الأرْضْ هْنا
سُبْحانْ الْخَلاّقْ الْعْظيمْ هاتَفْ بِها الّلْسانْ
سُبْحانْ الْخَلاّقْ الْعْظيمْ خافَقْبِها وَجْدانـــــــي
فيها كُلّْ مْنَــــــى
سبْحان الْخَلاَّقْ الْعْظيمْ تَسْبيحة مَنْ سَكْْرانْ
سابَحْ في بَحْرْ مْنَ الْعْتيقْ ما مْعَتقْ فَدْنانـــي
وَالرّوحْ فْ مَـــحْنة
مَحْنَتْ نَفْسي مَنْ شي مْجادْبة فَ:الضَّيْ وْديجان
تَعْلا بِيا تَعْلا وْحينْ تَنْزَلْ بِيّا مَنْ ثانــــــــــــــي
نَغْرَقْ ف:اللّعْنة
ونا هَذْ الْمَرّة مْزاوَكْ فْـأياتْ الرَّحْمانْ
اللّي فَصْحَتْ لي عَنّْها الإشاراتْ فْتَمْعانـــــي